اسمع يا فلان
كتبها(¯`·._.·(واحدتاني)·._.·°¯) ، في 2 يونيو 2008 الساعة: 06:37 ص
أنا الشاعر يا فلان
وزمام الكلمة ف إيدي
وجرسي أكيد رنان
وقوافي الشعر الصعبة
بتبات على عتبة داري
وإللي ف قلبي على لساني
مجنون ما اعرفشي أداري
فارس وفتوه
وزي م تقول
وقد القول
وآكل فول
ومهما الأفكار هـ تعافر
وبحور الشعر تسافر
أنا برضوا القبطان
أنا الشاعر يا فلان
**************
غبت أنا أغيب بمزاجي
ولا حدش بيغيبني
لو أكتب أنا أتعبكوا
ولا حدش فيكوا يتعبني
وكلامي ده بيعجبكوا
ولا حدش فيكوا يعجبني
لو أمسك قلمي واكتب
قلمك يتكسر ف إيديك
وإللي باكتبه هـ يفيدني
وإللي بتكتبه ما يفيدك
لو بدك ترقص قولي
أديك الطرحة التولي
وأمسكلك أنا ع الوحدة
دي الوحدة دي مهنة جدي
لكن تتحنجل فيها
وتسوق العظما عليا
وتفكك عقدك فيا
دا أنا مفطوم عامية
بشرفي أنا أخفيها
ولا خلي مخلوق فيها
والدور والباقي عليا
دا زمام الكلمة ف إيدي
وجرسي أكيد رنان
دا أنا برضو القبطان
أنا الشاعر يا فلان
***************************
أرسلها صديق لي … يواسيني بعد ما شاهد هجوم شخصية كبيرة علي بالباطل .. علي انا الغلبان … تحياتي
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
