تصور إنه في مصر حتى الآن ممكن واحد ببساطة يضيع ورا الشمس ،، لا تقولي قانون ،، ولا حقوق إنسان ،،ما تستغربش ،، أنا كمان صعب إني أصدق ،،،بس السؤال لمصلحة مين ،، مين مصلحته فوق مصلحة الوطن ،، مين مصلحته يمنع أبسط حقوق التعبير ،، مين مصلحته إنه يمنع أي فكر حتى لو كان فكر معارض ،، بس طبعا مش ح تروح ورا الشمس علشان بتشتم ،، أو حتى نفسك تقلب نظام الحكم ،،، المهم إنك ما يكونش لك مريدين ،، ما تقعدوش مع بعض يعني امشي في الشارع واشتم اتخن شنب قصدي اكبر راس من غير شنب ما حدش ح يقولك تلت التلاتة كام ،، لكن لو قعدت انت وكام واحد صحابك من الحاقدين طبقيا على رجال الاعمال اللى ماسكين الحكومة ،، آدي دقني لو شفت الشمس تاني لانهم ح يخدوك وراها

والله عارف إن حب الوطن فرض بس يعني إيه وطن؟ لازم نعيد النظر في معنى كلمة وطن

والآن انقل لكم رأي (صعلوك) عن دفتر

************

مصر هي أمك

دي بقى بالنسبة ليا شتومة

 

لأن أمي مش وسخة .. ولا بتتورث ..

 

ولا أتأممت .. ولا أتباعت ..

 

ولا أتفتحت -  ولامؤاخذة - ع البحري

 

كمان لو حاول أي شخص يتعرض لها ..

 

أنا وأخواتي ناكل مصارينه

 

يعني أمي مش ملطشة ولا عيالها هفء .

 

..أمي  ما راحتش مدارس ورغم كده

 

علمت نفسها القراية

 

فـ بتعرف هي بتمضي على أيه ..

 

وعارفة الفرق بين الأنقلاب والثورة

 

مافيش يوم غلت عليا فيه حضنها .

 

ولا بتشحت عليا من ورا ضهري ..

 

وتضرب الفلوس فـ جيبها

 

فأعيش أنا مديون لناس ..

 

لا أعرفها ولا يعرفوني

 

مستحيل فـ يوم تبيع حد من ولادها ..

 

لا برضا ولا غُصبانية

 

لو حد قال أنها أُم الدُنيا هـ تزعله ..

 

أو أقله تخرم له عينيه .

 

أمي عيالها مش أغبيا ولا متخلفين ..

 

 

أمي عيالها مش جهله

 

 

ولا حد فينا رمى على وشها ورقة ..

 

 

أو دس كيس زبالة تحت باطها

 

أمي ما فرطتش فـ جسمها أو أسمها

 

عشان كل ده و حاجات تانية كتير ..

 

********** 

أمنع أي حد يقول لي الكلمة دي

 

 

ولو أي شخص مش عاجبه ..

 

أو مُعترض الكلام ده

 

فـ هأكون سعيد جداً وأنا بأقول له :

 

مـصـر هـي أُمـك

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج