حـــــــــــــــــــدوته مصـــــــــــــــرية
كتبها(¯`·._.·(واحدتاني)·._.·°¯) ، في 20 ديسمبر 2006 الساعة: 11:20 ص
منرضاش
منرضاش تدوس البشر بعضها
منرضاش يموت جوا قلبى نداه
منرضاش تهاجر الجذور ارضها
منرضاش قلبى جواى يغنى
واجراس تدق لصرخه ميلاد
تموت حته منى
اجراس بتعلن
نهايه بشر من العباد
الحكمه قتلتنى وحيتنى
وخلتنى اغوص فى قلب السر
قلب الكون
قبل الطوفان ما يجى
خلتنى اخاف عليكى يا مصر
واحكيلك ع المكنون
مين العاقل فينا مين مجنون
مين المدبوح من الالم
مين اللى الظالم فينا مين مظلوم
مين اللى ميعرفش غير كلمه نعم
مين اللى محنيلك خضار
الفلاحين الغلابه
مين اللى محنيلك عمار
عمالك الطيابه
مين اللى بيبيع الضمير
ويشتري بيه الدمار
مين هو صاحب المساله
والمشكله
والحكايه والقلم
رايت كل شئ
وتعبت على الحقيقه
قابلت فى الطريق عيون كتير بريئه
اعرف بشر
عرفونى لا
لا معرفونيش
قبلونى وقبلتهم
بمد ايدى لك
طب ليه ما تقبلنيش
لا يهمنى اسمك
لا يهمنى عنوانك
لا يهمنى لونك ولا ميلادك مكانك
يهمنى الانسان ولو مالوش عنوان
ياناس ياناس يا مكبوته
هى دى الحدوته
حدوته مصريه
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
ديسمبر 1st, 2006 at 1 ديسمبر 2006 5:11 م
طب ليه ما تقبلنيش
لا يهمنى اسمك
لا يهمنى عنوانك
لا يهمنى لونك ولا ميلادك مكانك
يهمنى الانسان ولو مالوش عنوان
ياناس ياناس يا مكبوته
………..
صباحك ياسمين وسكر
حكمت داوود
ديسمبر 1st, 2006 at 1 ديسمبر 2006 6:06 م
حكمت داؤود*****دائما كلماتك تنقط سكر …… انا واثق انك ليس لك اعداء وان كل من يعرفك لا بد ان يتمسك بك وبقلبك الذي يتسع لكل العالم
ديسمبر 2nd, 2006 at 2 ديسمبر 2006 10:43 ص
مرحبا
إذاأردتم التعرف على بلدي الحلوة سوريا
تفضلوا لعندي على مدونتي الجميلة
بس لازم تعلقوا
من شان أتعرف عليكم منيح
أختكم الصغيرة إلاف مازن الشيحان
لكم محبتي
ديسمبر 2nd, 2006 at 2 ديسمبر 2006 2:18 م
إلاف ………. مرحبا ……. مين ما يحب سوريا ….. انا اعشقها واعشق كل ارض عربية تحياتي وفورا نزور مدونتك ….. تحياتي(واحدتاني)………والسلام
ديسمبر 20th, 2006 at 20 ديسمبر 2006 1:05 م
رسائل الزمــن المــــر (2)
عبد المجيد راشد
وصلتنى الرسالة الثانية من الصديق و الشاعر أحمد شلبى فى الاثنين 18 ديسمبر ، و كانت أيضا قصيدة من روائعه الشعرية ، و حركت كسابقتها مخزون الشعر الراكد داخل نفسى ، و استطاع بكلماته أن يستفز الشاعر المحبوس داخلى ، مما حفزنى للرد عليه شعرا
و اليكم القصيدة الرسالة ، و كذلك الرد عليها .
أولا :ـ الرســــالة
===========
لو شبعت
أرض فلسطين شهدا
انت ما تشبعش
لو نفعت الخرق الدايبة
فى تصليح الحنفيات السايبة
انت ما تنفعش
حياتنا فى حياتك عطلت
مشاريعنا و أحلامنا إتهطلت
موضتك بطلت
و بقينا هفية
جيوش م الخيل المخصية
منساقة بجحش
على التعابين السامة حنيت
و عطفت
خطفوا اللقمة من بق عيالنا
و خطفت
نشفتوا علينا الميه
و نزلتوا على النفط
يا قائد أسراب التخريم و الشفط
خرقت سفينة أحلامنا
بقت نعش
أيامنا هباب
فى الليل و الصبح
( حسنك ) كداب
و ( جمالك ) قبح
زادت عذابتنا الكاوية
و زكايب ( عزك ) بتزيد
انت
مولانا معاوية
و هو
طباخ السم يزيد
و احنا
آل البيت المطاريد
فى غابات السقعة
و شعاب البيد
نغنى الغربة و طعم الجوع
و ركوع
ما بنركعش
يا عملنا الأسود
عن سكتنا احود
عالسكة اللى تودى
و ما ترجعش
لو شبعت
انت ما تشبعش
لو نفعت
انت ما تنفعش
أحمد شلـــــبى
***
ثانـيا :ـ الـــــرد
==========
مكتوب على بابها
هوه اللى خرابها
يا فاتح صفحات الزمن المر
طالعته ما عـدتش تسر
مكتوب عنوان
على أول باب
صدقك كداب
حكمك نصاب
الناس فى حياتك
ليلها عذاب
و نهارها هباب
و حياتها جحيم
مش لاقية القوت
و لا عارفة تفوت
( حسنك ) ما حسنهاش
و ( جمالك ) ما جملهاش
و ( عزك ) ما عزهاش
و ( كمالك ) ما كملهاش
و ( شريفك ) ما شرفهاش
و ( عزمك ) ما عزمهاش
و ( سرورك ) ما سرهاش
و ( نظيفك ) ما طولهاش
” سجونك ” ما همتناش
” تقليع ف هدومنا ” ما خوفناش
” ترمينا ف صحرا ” ما يهمناش
الهم فى عهدك ببلاش
و الجوع
و البؤس
ما خلاش
أه يا نظام أوباش
أحناش
إرحل ..
غــور
خليت الأرض فى حكمك بور
أيامك جور
و سنينك
جابت للناس
كل شرور
عبد المجيد راشد
ديسمبر 20th, 2006 at 20 ديسمبر 2006 2:24 م
عبد المجيد راشدالله عليك وعلى كلامك الواعي … تحياتي (واحدتاني)…والسلام